“أمشي في صمت الشارع المعزول أمشي في أرض الشارع المبلول لا سيجاره بتدَفّي ولا الجيوب بتدَفّي شوقي إليكي يبان فـ رعشِة كفّي شوقي إليكي يبان فـ دخاني حزين والحزن أوقات يبقى مش إنساني الحزن أوقات يبقى حزن طموح بيجَرّح العين والفؤاد والروح”

“رفَضِتنا بلدنا... ورفَضِتنا المطارات... والعالم طَفّى النور.. وضَرَب صواريخ فـ الجو.. وغنّى من غير ما يبُص على الركن المرميين فيه انا وانت وأحزاننا من غير ما يقول - بعزومه - تعالوا احتفلوا معانا أو حتى بعَطف «الچنتلمان» يسحَب منديل من جيبه عشان نسمح بيه بُكانا”

“كلمة: معلش.. كفايه - لا هْيْ بتقدم.. ولا بتأخّر - لكن.. يِكفي انها بتحسسني ان انت معايا وإنك.. يا بعيد عني بلاد وبحور مش ناسي أخوك المظلوم المقهور وبتتألّم علشانُه..”

“مش شرط تكون جوّه الأحداث علشان يتقال حاسس بالناس مش شرط.. مش شرط تطولَك شَظْيَه ف حرب أو يلمس جسمك ضرب مش شرط تعاني.. لكن يِكفي إن الواحد مِنّا يكون حاسس بالتاني يكون فاكرُه ف دَعاويه وصَلاتُه.. ويراعي هزيمة اخوه الإنسان.. ف انتصاراته ويفرح على قدّه..”

“- حلوه مصر؟.. مش هارد بـ آه و لأ هاقول : مانيش عارف.. لَكِنّي بحبّها علشانها شبهِك.. - خدت إيه من مصر؟ إسمي.. كفايه إسمي وأرض ما زرعهاش أبويا بناها بالطوب.. والقمر على سطح جامع وانتي طبعاً... | كُنت بكدِب | كنت عايز أقول : ماخدتش مِنْها غيرِك بس فلسِفت الإجابه عشان أبان راسي و تقيل ....”

“النهارده الصبح قرّر يحدِف الطوبه فـ إزاز الدنيا يكسَر كِبرَها.. يلوي رْقبتها عشان تبص بعين رحيمه شويه ع الناس اللي كاتباهم على الهامش أسامي ( بدون أهميه )..”